Friday, March 9, 2007

ചോറപ്പാ.

ചോറപ്പാ.

യാഹൂവിനെതിരെ സമരം ചെയ്തും മുദ്രാവാക്യം മുഴക്കിയും ക്ഷീണിച്ച്‌ വിശന്നിരിക്കുകയാണ്‌ ബൂലോഗത്തെ ബ്ലോഗന്മാരും ബ്ലോഗിണിമാരും. അനോണിയായി വന്ന മഹവിഷ്ണു എന്ന ബ്ലോഗില്‍ കയറി കുറേ നാളത്തെ ദേഷ്യവും തീര്‍ത്ത്‌ കുറച്ചുപേര്‍ വിശന്നിരിക്കുന്നു. ഇന്നിതാ ഷാര്‍ജയില്‍ വിശാലമനസ്കന്റെ 'കൊടകരപുരാണം' പുസ്തകപ്രകാശനവും. ദില്‍ബന്‍ അവിടെ വെറുതെ അങ്ങോട്ടും ഇങ്ങോട്ടും ഓടി നടക്കുന്നതുകാരണം തട്ടുകട തുറന്നിരിക്കാന്‍ സാധ്യതയില്ല.എന്തായാലും വിശന്നിരിക്കുന്നവര്‍ക്കായി ഇതാ സ്പെഷല്‍ ചോറ്‌. ഇതിനുവേണ്ട കറികള്‍ കറിവേപ്പിലയില്‍നിന്നോ, നളപാചകത്തില്‍നിന്നോ ആവശ്യംപോലെ എടുക്കാം.
മുളംകുറ്റിക്കകത്തെ ചോറ്‌.

അരി പച്ചമുളംകുറ്റിയിലിട്ട്‌ തീയില്‍ ചൂടാക്കിയെടുക്കുന്നു. ഖംത്തി ഗോത്രവര്‍ഗ്ഗക്കാരുടെ ഒരു സ്പെഷല്‍ ഐറ്റം. നല്ല വാസനയുള്ള 'ഖംത്തി അരി' കൊണ്ടു ഉണ്ടാക്കിയ ഈ ചോറിന്‌ ഒരു പ്രത്യേക രുചിയാണെന്നാണ്‌ പറയുന്നത്‌. ഇതിന്റെ വിലയോ.. ഒരു കുറ്റിക്ക്‌ വെറും 200 രൂപ മാത്രം.
-------------------
ഉണ്ടാക്കുന്ന വിധം:
അരി കഴുകി നനവോടെ വാഴയിലയില്‍ നിരത്തി മുളംകുറ്റിക്കകത്തു കയറുന്ന വിധം ചുരുട്ടി രണ്ടറ്റവും മടക്കി കെട്ടുക. ഇതിനെ മുളംകുറ്റിയിലേക്ക്‌ ഇറക്കി വെക്കുക എന്നിട്ട്‌ ലേശം വെള്ളം മുളംകുറ്റിക്കകത്ത്‌ വാഴയിലക്ക്‌ പുറത്തായി ഒഴിക്കുക. മുളംകുറ്റിയുടെ തുറന്ന അറ്റം നല്ലപോലെ വാഴയില കൊണ്ട്‌ അടച്ച്‌ കെട്ടുക. ഇതുപോലെ അരി നിറച്ച മറ്റു മുളംകുറ്റികളും ഒരുമിച്ച്‌ വിറക്‌ കത്തിച്ച്‌ തീയില്‍ ചുട്ടെടുക്കുക. മുള കൂടുതല്‍ കരിഞ്ഞുപോകാതെ ഇടക്ക്‌ മറിച്ചുകൊടുക്കണം. (അല്ലെങ്കില്‍ തീ നല്ലപോലെ തട്ടുന്നവിധം ഒരു ലോഹസ്റ്റാന്റിലോ വെച്ച്‌ ചുട്ടെടുക്കുക) ഉള്ളിലുള്ള ലേശം വെള്ളവും അരിയുടെ നനവും ഉള്ളതുകൊണ്ട്‌ കരിയാതെ, ആവിയില്‍ ഒരു പ്രഷര്‍ കുക്കറിലെന്നതുപോലെ ഇതു വേകും, എന്നാണ്‌ ഇതു പരീക്ഷിച്ചിട്ടുള്ളവര്‍ പറയുന്നത്‌. പച്ചമുളയുടെ പുറത്തെ തീ തട്ടി കരിഞ്ഞ ഭാഗം ചെത്തി വൃത്തിയാക്കിയാല്‍ കാണാനും ഭംഗി. ഇവിടെയുള്ളവര്‍ വാഴയിലക്ക്‌ പകരം വാഴയിലപോലത്തെ (ചിത്രത്തില്‍ കാണുന്നത്‌) ഒരു കാട്ടുവാഴയുടെ ഇലയാണ്‌ ഉപയോഗിക്കുന്നത്‌. ഇലയില്‍ വേവിച്ചെടുക്കുന്നതുകൊണ്ട്‌ അതിന്റേതായ ഒരു ടേസ്റ്റും ഉണ്ടാവും.
ഇതെ പോലെ തന്നെ മീനും മുളംകുറ്റിയിലിട്ടും വേവിച്ചെടുക്കാം. നല്ല രുചിയാണ്‌.
മീന്‍ നല്ലപോലെ കഴുകി വൃത്തിയാക്കി (കഷണമാക്കാതെ) ഉപ്പും ലേശം മഞ്ഞള്‍ പൊടിയും അല്‍പം കുരുമുളകു പൊടിയും പുരട്ടി ഇതേപോലെ ഇലയില്‍ പൊതിഞ്ഞ്‌ പച്ചമുളംകുറ്റിയില്‍ ഇട്ട്‌ ഇലകൊണ്ട്‌ മൂടികെട്ടുക. എന്നിട്ട്‌ തീയില്‍ ചൂടാക്കി ഏടുക്കുക. ഇവിടെയുള്ളവര്‍ ഇതിന്റെ കൂടെ "ബാംബൂ ഷൂട്ട്‌" (മുള പുതുതായി പൊട്ടിമുളച്ചുവരുമ്പോള്‍ ഉള്ള മൃദുലമായ അറ്റത്തെ ഭാഗം) ചെറുതായി അരിഞ്ഞു ചേര്‍ക്കും ടേസ്റ്റ്‌ കൂട്ടാനായി. നമ്മള്‍ക്കൊന്നും ആ ടേസ്റ്റ്‌ ആദ്യം അത്ര ഇഷ്ടപെടുകയില്ല. പക്ഷേ ആരോഗ്യത്തിന്‌ നല്ലതാണ്‌ ഇതെന്നു പറയുന്നു.
കൃഷ്‌ \krish

Monday, March 5, 2007

ഇങ്ങനെയുമോ..? (Plagiarism by Yahoo India)

ഇങ്ങനെയുമോ..? (Plagiarism by Yahoo India)

യാഹൂ ഇന്ത്യയുടെ മലയാളം പോര്‍ട്ടലില്‍ വിഭവങ്ങള്‍ നിറക്കുന്നതിനായി കണ്ടെത്തിയ എളുപ്പവഴി -- പല മലയാളം ബ്ലോഗുകളില്‍ നിന്നും ബ്ലോഗുടമയുടെ അറിവോ സമ്മതമോ ഇല്ലാതെ സൃഷ്ടികള്‍ എടുത്ത്‌ അതേപടി യാഹൂ പോര്‍ട്ടല്‍ നിറക്കുക. ഈ കാര്യം ശ്രദ്ധയില്‍പെടുത്തിയപ്പോഴോ, ഇത്‌ ഞങ്ങളല്ലെന്നും വിഭവങ്ങള്‍ നല്‍കിയ വെബ്‌ദുനിയ ആണെന്നും പറഞ്ഞ്‌ ഒരു മാപ്പ്‌ പോലും പറയാതെ കൈയ്യൊഴിഞ്ഞ്‌ അടിച്ചുമാറ്റിയ സൃഷ്ടികള്‍ നീക്കം ചെയ്യുക.
കോപ്പിയടിച്ച സാധനം യാഹൂ-വിന്റെ സൈറ്റില്‍ ഇട്ടതിന്‌ യാഹൂ-വല്ലെ ഉത്തരവാദി, അവരല്ലേ മറുപടി പറയേണ്ടത്‌? അല്ലാതെ കൂലിപ്പണിക്കാരന്‍ വെബ്‌ദുനിയാ അല്ലല്ലോ.
ഇക്കാര്യത്തില്‍ മലയാളം ബ്ലോഗെര്‍സ്‌ പ്രതിഷേധിക്കുന്നു - 2007 മാര്‍ച്ച്‌ 5-ന്‌.
--------
Malayalam Bloggers protest against Yahoo India for its act on plagiarism and content lifting from individual Malayalam Blogs without prior consent or knowledge, for publishing in Yahoo India's Malayalam portal. When the matter was brought to the notice of Yahoo authorities, they just deleted the copied contents and shrugged off its responsibilities putting the blame on Webdunia.com, the content provider for Yahoo India. So, 5th March, 2007 is observed as protest day by Malayalam Bloggers, against plagiarism / content lifting by Yahoo India.

Links:
1.
കറിവേപ്പില - സൂര്യഗായത്രി
2. ഇഞ്ചിമാങ്ങ - ഇഞ്ചിപ്പെണ്ണ്
3. ബ്ലോഗ് കോപ്പിയടിവിരുദ്ധദിനം
4. Yahoo Plagiarism Protest Scheduled March 5th
5. Malayalam Bloggers Don’t Agree with Yahoo India

Visitors || സന്ദര്‍ശനത്തിനു നന്ദി.

(C) കൃഷ് | krish

This blog is protected by copyright. If you need the images from this blog, please contact me.